Mendimet e pandërprera në formën e modeleve që ndryshojnë me shpejtësi, të përsëritura dhe analizimi i tepërt rreth një teme të caktuar janë një tipar i zakonshëm i ankthit dhe çrregullimeve të tjera mendore.

Ato gjithashtu mund të ndodhin sa herë që jeni në një gjendje shqetësimi ose stresi, edhe nëse nuk po përjetoni simptoma të llojeve të tjera të çrregullimeve mendore.

Mbi-analizimi i mendimeve tuaja mund të karakterizohet nga mendime të përsëritura të ngjarjeve të së kaluarës që ju kanë shkaktuar ankth ose trishtim, por gjithashtu mund të shprehin shqetësimet tuaja për zhvillimin e situatave të ardhshme. Është një sërë mendimesh që i keni ekzagjeruar dhe që ju konsumojnë kohën e çmuar pa pasur shpeshherë ndonjë bazë logjike.

Ndoshta duken kështu: “Unë gjithmonë harroj atë që duhet të bëj, jam komplet një idiot! Nëse nuk i mbaj mend të gjitha punët e prapambetura që kam, do të më pushojnë nga puna. Nuk e di se çfarë do të bëj nëse kjo ndodh… Unë duhet të kisha marrë këtë punë që më ofruan gjashtë muaj më parë. Nëse humbas punën, nuk do të kem para. Më duhet të punoj më shumë orë për ta mbajtur këtë punë. Kjo më bën të ndihem më i dëshpëruar. Unë jam shumë i pakënaqur. Çfarë do të bëj?”

Kur mendime të tilla vërshojnë mendjen tuaj, ato ju shterrojnë energjinë, ju pengojnë të shijoni momentin e tanishëm dhe mund të krijojnë një “lak” në trurin tuaj që duket sikur është shumë e vështirë të çliroheni. Ato gjithashtu mund ta bëjnë më të vështirë për ju që të përqendroheni në kryerjen e detyrave të përditshme, madje mund të ndikojnë në kujtesën dhe gjumin tuaj.

Ndjenja që vjen nga mendimet galopuese janw mjaft e bezdisshme dhe e frikshme sepse krijojnw një ndjenjë të të qenit jashtë kontrollit. Por të kesh këto lloj mendimesh nuk do të thotë se je me të vërtetë jashtë kontrollit ose i çmendur, por se ndihesh në ankth dhe se niveli i stresit është më i lartë se zakonisht.

Më poshtë, do të gjeni disa teknika që mund t’i përdorni për të zbutur mendimet tuaja garuese dhe për t’u ndjerë më të qetë.

Përdorni “shkëputjen mendore”

Mendja jonë zakonisht shqetësohet për gjërat për të cilat është e bindur se janë të vërteta, por në realitet shumicën e kohës nuk janë të vërteta. Ju mund të balanconi prirjen e mendjes suaj për të parashikuar rezultatin më të keq të një situate duke menduar për skenarë alternativë që do të kenë një rezultat pozitiv.

Për shembull, le të themi se burri juaj duket i largët dhe në të njëjtën kohë fillon të dërgojë dhe të marrë shumë email-e. Menjëherë mendon se ai duhet të ketë një lidhje jashtëmartesore. Një skenar alternativ është që gjatë kësaj periudhe ai duhet të punojë orë shtesë për një projekt që ka ndërmarrë në punë. Analizoni se çfarë ka më shumë gjasa të ndodhë dhe nëse nuk keni kuptim me mendimet tuaja, më mirë pyeteni vetw atë. Shumicën e kohës, skenari më i keq që përpunon mendja juaj nuk është ajo që ndodh.

Përqendrohuni në të tashmen

Përqendrimi në të tashmen do t’ju ndihmojë të pranoni dhe të hiqni dorë nga ajo që nuk mund të kontrolloni. Gjithashtu do t’ju ndihmojë të kuptoni se nuk mund ta ndryshoni të kaluarën tuaj dhe se e ardhmja juaj nuk ka ndodhur ende, kështu që është humbje kohe të vazhdoni të mendoni për to. (Kjo nuk do të thotë, sigurisht, se ju nuk jeni të vetëdijshëm për atë që ka ndodhur në të kaluarën ose çfarë do të ndodhë në të ardhmen.) Pastaj provoni të merrni frymë thellë dhe pyesni veten se si ndiheni.

Mbani shwnime
Shkrimi i shqetësimeve tuaja në letër ju lejon t’i rishikoni ato në çdo kohë më vonë. Ju nuk keni pse t’i hidhni ato tërësisht dhe mund të ndiheni të sigurt duke ditur se jeni në gjendje t’i rishikoni ato sa herë që dëshironi. Gjithashtu, energjia që ushtroni për t’i shkruar ato angazhon mendjen tuaj dhe zvogëlon fuqinë e mendimeve tuaja garuese. Kur mendimet qëndrojnë vetëm në kokën tënde, ndihesh si rrëmujë, ndërsa vënia me shkrim i organizon ato.

Ju mund të përdorni letër dhe laps ose një kompjuter, cilado që funksionon më mirë për ju. Pasi të keni marrë disa minuta për të organizuar mendimet tuaja dhe për t’i hedhur ato në letër ose në ekranin e kompjuterit tuaj, mendja juaj do të jetë më e qetë. Nëse dëshironi, mund të caktoni një afat kohor për t’i rilexuar, për të bërë një pushim dhe për t’u kthyer më vonë për t’i vlerësuar ato.

Merrni frymë thellë
Frymëmarrjet e thella e zhvendosin reagimin luftarak të sistemit nervor simpatik në përgjigjen e relaksuar të sistemit nervor parasimpatik. Provoni të numëroni deri në tre kur merrni frymë dhe deri në pesë kur nxirrni frymën. Kushtojini vëmendje vetëm frymëmarrjes tuaj ndërsa përpiqeni ta ngadalësoni atë. Mendja juaj do të endet, por përpiquni të përqendroheni në frymëmarrjen tuaj.

Cilado nga këto teknika që vendosni të përdorni, do të duhet praktikë e rregullt për një periudhë të gjatë kohore për të parë rezultate. Fatkeqësisht, shumë njerëz presin rezultate të menjëhershme dhe heqin dorë shumë shpejt. Në vend të kësaj, ju duhet të jeni të qëndrueshëm dhe të durueshëm, sepse kërkon kohë për të zhvilluar zakone të reja.

Nëse zbuloni se nuk jeni në gjendje t’i mbani nën kontroll mendimet tuaja garuese, mendoni të konsultoheni me një psikolog. Mendimet ankthioze mund të jenë pjesë e një çrregullimi mendor që mund të trajtohet në mënyrë efektive me psikoterapi ose medikamente, ose një kombinim i të dyjave.

Burimi: psychologynow.gr
Përgatiti: Fon Ilia, Psikolog Klinik – Holistic Coach
CEO – Institute of Body Language Albania